ZAIDI YA WANAFUNZI LAKI SITA WANYIMWA HAKI YA KUPIGA KURA

wanafunzi wa Chuo Kikuu Cha Dar es salaam

Zaidi ya wanafunzi laki sita wa vyuo vikuu, vyuo vya kati na kidato cha nne nchini huwenda wasishiriki kupiga kura kwenye uchaguzi mkuu ujao wa madiwani,wabunge na Rais kutokana na ratiba ambayo imetolewa na wizara ya elimu kuhusu mihula ya kufunga na kufungua vyuo nchini kukinzana na ratiba ya tume ya uchaguzi nchini,NEC.

Ratiba ya mihula ya kufunga na kufungua vyuo ambayo imetolewa na wizara ya elimu mwaka huu, imeibua hofu kwa wasomi wa vyuo mbalimbali nchini kutoshiriki ipasavyo kwenye uchaguzi mkuu ujao, ambapo jumuiya ya wanafunzi wa vyuo vikuu ambao ni wanachama wa chama cha demokrasia na maendeleo(CHASO) Mkoani Mbeya wamelibaini hilo na kuanza kupaza sauti zao kuidai haki hiyo.

 

Kutokana na hofu hiyo, CHASO imeandika waraka na kuelekeza katika ofisi ya katibu mkuu wa chama cha Demokrasia na maendeleo CHADEMA ikimtaka kuwatumia wabunge wake kupeleka hoja binafsi BunGeni ya kurekebisha sheria ya uchaguzi ili iwaruhusu watanzania wote kupiga kura wakiwa mahali popote ndani ya mipaka ya Tanzania.

 

Baadhi ya wanafunzi hao pia wakaelezea umuhimu wa wao kupiga kura, huku wakidai kuwa hawako tayari kunyimwa haki yao ya kikatiba kwenye uchaguzi mkuu ujao.

Source itv